CNSS
بزاف ديال الناس خدامين و عندهم CNSS ولكن مكيعرفوش من مورا سنين طويلة ديال الخادمة شحال غادي ابقا لهم فالتقاعد فهاد المقال غادي نشرحو كيفاش CNSS كيتحسب التقاعد
+اولا: تعريف CNSS :
او الصندوق الوطني للضمان الاجتماعي هو صندوق كيقدم مجموعة من الخدمات للموطنين (لي خدامين فالقطاع الخاص)، من بينها التعويض على فقدان الشغل(CHOMAGE)، التعويض على المرض (AMO), الحصول على تقاعد( la retraite )...
+تانيا : الاقتطاعات :
- كتساهم نت كعامل، ف cnss باش تشد تقاعد ب %6.74 فالمئة من الصلير الخام (مايسمى ب salaire brut imposable ).
- و المشغل ديالك كيخلص عليك كدالك تقريبا %21،09 من (salaire brut imposable) .
+ثالثا : كيفاش تحسب التقاعد ديالك :
كيخصك تكون وصلتي ل 60 سنة .
وخصك تكون جمعتي 3240 نقطة ( نقطة = يوم عمل) بمعنى خصك تكون خدمتي 3240 يوم دكلاري . لي ممكن تجمعها ف تقريبا 11 عام من العمل.
3240 نقطة كتعطيك الحق تستافد بتقاعد ديال 50% ديال الصلير المتوسط باش كنتي خدام 8 سنوات الاخيرة( 96 شهر) نعطيك متال : اخر 96 شهر خدمتي ب 4000 درهم. كناخدو هد 4.000 درهم ضارب 50% غتعطينا تقاعد ديال 2.000 درهم .
لكن السؤال لي ممكن تسول دبا هو الا متلا وصلتي ل كتر من 3240 نقطة. متلا 5000 نقطة واش غضيع فالنقاط لي شايطين؟ طبعا لا هنا cnss كتقول ليك على كل 216 نقطة(يعني كل عام ديال خدمة) زايدة على 3240 غنزيدك 1% على 50% .
نعطيو متال باش نفهمو كتر نفترض انت وصلتي ل 5000 نقطة : كناخدو 5000 ناقص 3240 تساوي 1760.
كناخدو هد 1760 لي شاط كنقسموها على 216 تساوي % 8.14 , يعني غتزيدك % 8.14 على %50 لي ديجا غتاخد و غتساوي % 58.14.
ونفترض تخلصتي ف اخر 96 شهر بصلير ديال 4.000 درهم . كناخدو 4.000 ضارب % 58.14 غتعطينا تقاعد ديال 2.325,60 درهم.
-غير للمعلومة اكبر نسبة ممكن توصل ليها هيا 70% و الصلير مسقف ف 6.000 درهم، بمعنى اخر اكبر صلير تقاعد ممكن توصل ليه هو 4200 درهم شهريا.
-للمعلومة ايضا واش الى بغيت متلا يكون عندي تقاعد كبر من 4200 درهم واش من حقي. اه طبعا لكن خصك تكون متلا مشتارك فصندوق CIMR (غادي نشرحه فمقال أخر من بعد انشالله) حتى هدو كتخلص فيه كل شهر وفاش كتوصل لتقاعد ديالك كيزيدوك شي بركة فالصلير على حسب انت شحال بغيتي وشحال كنتي كتخلص ليهم.
+رابعاً : واش من حقي نسترجع التعويضات ديالي في حالة ماوصلتش ل 3240 نقطة:
هنا cnss دايرة ليك 2 ديال الاختيارات:
الاختيار الاول : التأمين الاختياري
يائما تكمل النقاط لي خاصينك بالفلوس و كيتسمى التأمين الاختياري وضروري تكون جمعتي على الاقل 1080 نقطة وضروري ايضا تكون وقفتي على الخدمة وضروري ايضا دير طلب في غضون عام من نهار وقفتي على الخدمة.
و الاختيار التاني : استرجاع مبلغ الاشتراكات
هنا cnss كتقول ليك من حقك ترجع الفلوس لي كنتي كتخلص ليا بشرط كون وصلتي ل 60 سنة و ماتكونش خدام وماتكونس ستفدتي من شي معاش كتعطيه او كتقترحو cnss.
(هنا متلا الا قدر الله شي أب او أم توفات راه من حق دوي الحقوق يطالبو بسترجاع الاشتراكات. )
ليست هناك تعليقات:
إرسال تعليق